"არა ცენზურას!", "კულტურა ცოცხალი და დამოუკიდებელია!" - 20 სექტემბერს, პარლამენტში კულტურის მინისტრის თეა წულუკიანის მოსმენის პარალელურად, საკანონმდებლო ორგანოსთან კულტურის სფეროს წარმომადგენლები შეიკრიბებიან და საპროტესტო აქციას გამართავენ.
აქცია 18:00 საათზე დაიწყება. ორგანიზატორების თქმით, აქციაზე გააჟღერებენ "უამრავ გადაუჭრელ პრობლემას, რომელსაც კულტურის სამინისტრო თავს ვერ ართმევს". ამასთან, აქციაზე კულტურისა და მეცნიერების სექტორები მკაფიო მოთხოვნებს დააყენებენ.
"ქართული ხელოვნება და მეცნიერება საფრთხეშია. კულტურის სამინისტროს პოლიტიკა ანადგურებს კულტურას - ჩვენი ქვეყნის იდენტობისა და ჩვენი სიამაყის მთავარ საყრდენს.
რეპრესიული პოლიტიკა გამოუსწორებელ ზიანს აყენებს ჩვენს ისტორიულ კულტურულ მემკვიდრეობას, მიზანმიმართულად აფერხებს თანამედროვე ხელოვნების და მეცნიერების განვითარებას, ახშობს თავისუფალი და კრიტიკული პროფესიული აზრის გამოხატვას; ცდილობს კულტურის მოთვინიერებას, შეზღუდვას, სამთავრობო პროპაგანდის ინსტრუმენტად ქცევას.
20 სექტემბერს, 18:00-ზე, პარლამენტის სამოქალაქო შესასვლელთან ვიკრიბებით, ხელოვნებისა და მეცნიერების წარმომადგენლები, ქართული კულტურის გულშემატკივრები. სიმართლის საათის ფორმატში გავაჟღერებთ იმ უამრავ გადაუჭრელ პრობლემას, რომელთაც კულტურის სამინისტრო თავს ვერ ართმევს. აქციაზე კულტურისა და მეცნიერების სექტორები დააყენებენ მკაფიო მოთხოვნებს", - აღნიშნულია ინფორმაციაში.
დახურვა